كثير يسألوني وش أفضل الشهادات؟ وكيف أبدأ بالأمن السيبراني؟
كثير تجيني أسئلة من ناس توهم بادين في مجال الأمن السيبراني، ودائم يتكرر نفس السؤال:
“وش أفضل الشهادات اللي تنفعني؟ وكيف أقدر أرفع فرصي في التوظيف أو حتى الترقية؟”
والحقيقة، هذا سؤال في محله.
بس قبل لا تفكر في الشهادات، لازم تعرف شي مهم جدًا:
الأمن السيبراني مو تخصص واحد، بل عالم كبير ومتفرّع، وكل مسار فيه له مجاله، وأدواته، وشهاداته، ومهاراته.
🔸 فيه اللي يشتغل على اختبار الاختراق (Penetration Testing)
🔸 وفيه اللي يركّز على تأمين الشبكات والبنية التحتية
🔸 وفيه من يتخصص في التحقيقات الرقمية (Digital Forensics)
🔸 وغيرهم كثير مثل إدارة المخاطر، حوكمة البيانات، والاستجابة للحوادث
وش يميز المجال؟
إنه من أسرع المجالات نموًا وأكثرها طلب حول العالم، والفرص فيه تزيد يوم عن يوم.
لكن بنفس الوقت، المنافسة صارت أقوى، وصار أصحاب العمل يدورون ناس فاهمين، عندهم علم حقيقي، مو مجرد شهادات.
طيب، وش يعني إن المجال حساس؟ وليش لازم تكون على قدر الثقة؟
لأنك تشتغل في بيئة أمنية حرجة جدًا، وأبسط غلطة – حتى لو كانت سهو بسيط – ممكن تفتح ثغرة. والثغرة هذي قد تسبب اختراق خطير، أو توقف أنظمة كاملة.
يعني بكل بساطة: ما فيه مجال للخطأ.
كل خطوة تسويها، وكل قرار تاخذه… لازم يكون محسوب ومدروس.
🎓 الشهادة لحالها ما تكفي!
اليوم نشوف كثير من الطلاب أو حتى الخريجين الجدد معهم شهادات في أمن المعلومات (أو الأمن السيبراني، كلها نفس التخصص). رغم إنهم توهم في بداية المشوار، تلقى عنده شهادة أو ثنتين، لكن خلّنا نكون واقعيين شوي: “الشهادة بحد ذاتها ما تعني إنك خبير.”
الشركات ما تنبهر من ورقة مكتوب فيها اسم الشهادة، اللي يهمهم فعلاً هو وش تعلمت؟ وش تقدر تسوي؟ هل أنت فاهم، ولا بس درست عشان تجيب الشهادة وتنسى بعدها كل شيء؟
🧠 وش يميزك عن غيرك؟
اليوم إذا رحت تقدّم على وظيفة في الأمن السيبراني، بتلقى عشرات غيرك مقدمين على نفس الفرصة. وش اللي يخليهم يختارونك أنت؟
أسهل طريقة عند الشركات إنها تفرز المتقدمين بسرعة هي إنها تشوف وش شهاداتهم. خصوصًا إذا ما عندك خبرات أو مشاريع مذكورة في السيرة الذاتية، تصير الشهادة مثل “بطاقة تعريف” تعطي انطباع مبدئي إنك فاهم في المجال.
لكن خلنا نكون واضحين… الشهادة لحالها ما تكفي.
هي تفتح لك الباب، بس اللي يثبت شطارتك هو وش تسوي بعدين:
- وش مشاريعك؟
- وش سويت في تجاربك أو تدريباتك؟
- هل قدرت تطبق اللي تعلمته على أرض الواقع؟
وهذا بالضبط اللي يثبت لهم إنك فعلاً مميز، مو بس عندك شهادات… بل قادر على تطبيق المهارات بشكل عملي وواقعي.
في الصورة الجاية، بتشوفون تقسيم جميل لتخصصات الأمن السيبراني، ومع كل تخصص فيه الشهادات المناسبة مرتبة من تحت (للمبتدئين) إلى فوق (للمحترفين).
ملاحظة: الترتيب الموجود بالصورة يعكس وجهة نظر اللي جهزها، ممكن تختلف شوي من شخص لثاني، بس بشكل عام مرتبة ومفيدة وأنصح فيها.
وهنا زيادة الخير خيرين ✨
جهزت لكم ملف بصيغة PDF يوضح نفس الفكرة بشكل منظم وسهل القراءة.
تقدر تشوف الشهادات المناسبة لكل تخصص، وتعرف وين تبدأ ووين ممكن توصل.
📄 اضغط على الصورة علشان تفتح ملف الـ PDF
المراجع